اغنیة محزن

ما  شفت طبعک  عجایب ، بس   تشمّرلی   بدیک

عفت کل اهلی او عمامی،او گمت ادوّر بس علیک

***

و اللّه صعبه  ابدیره  غربه ، و  ابهواک  اشتم حنان

مکدر او عینی اعلی دربک ، اتواعد او طال الزمان

***

اتحمّلت  منّک  مصائب ، و الوفاء  یشفی   العلیل

عمری  خلّصته  ابندامه ، او  ما  اعوفک  مستحیل

***

صرت قطره ابعینی تجری ، او صرت نهته او  ما اعوف

ترمی بسهامک ابگلبی ، دمی   یجری  اشلون  اشوف

***

اعوفن السابی دلیلی ، او فاگد النوم  اعلی   شأنه

اعوفن الشد بیده حزنی ، او غازی گلبی من حنانه

***

محزن او یلهب ضمیری ، و الحزّن بیت السرور

عشت  دوم  ابذکریاته ، شمعه بعیونی او یدور

***

ما یموت الیهدی روحه ، للمحب عار  او قرار

و الصداقه البیهه عازه ، للوعد   نار  او  شرار

***

امر ما خنت ابعهدنه ، امنین امر عینی اعلی بابک

گلبی تارک  کل نفیرک ، یدری بس  حامل  عذابک

***

تهت من یوم العرفتک ، تهت ضیّعت  النصیب

تهت ما اعرف طریقی ، من جفی عنّی الحبیب

***

حلم و اتمر لحظه  بیّه ، حلم  بس  طبعک  غرور

تنسه حب البیه ربینه ، او تنسه سهرات السحور

***

تطلب   الذلّه  ابشماته ، تطلب   العوز  ابصهیل

ذهب صغت الغیره بیدک ، ما یهم گلبی القلیل

***

جاسم ثعلبی (الحسّانی) 23/06/1396

اغنیّه اللّه اویاک

گلبی مشتول ابدلالک ، گلبی مشتول ابهواک

شبح و امعذّب حنانی ، ابد ما  لحظه  نساک

***

گمر تزهی ابکل حیاتی ، نجمه و افتر بس علیک

شم عطر طیبی یغالی ، ورده و افتر  بس  بدیک

***

هاک اخذ گلبی هدیّه ، هاک زیده ابذکریّات

هاک دمعی الصب اذیّه ، و العیون الساهرّات

***

وینک ابیا  بلد  ساکن ، وینک  اعیونی  فداک

وینک او عمری سبانی ، وینک ادوای اشلفاک

***

اتمرّضت هجرک بلانی ، او مرمرانی ابکل عذاب

شمعه بعیونک اذوبن ، او ما اظن حبّک سراب

***

بالسفر ما عندی راحه ، او لیلی بفراگک نجیب

صورتک تفتر ابذهنی ، او صوتک   ایقرّد غریب

***

حلم لو اشوفن جمالک ، حلم و اقبل بس دلیل

هوا و اتشمم وجودک ، ایطیّب ابگلبی العلیل

***

ریت اموت او انسی حبّک ، و انسه دار البیهه اجیت

و الچفن یستر اسرارک ، تگصی   بیه       اشحصلّیت

***

الوداع   او  داعت  اللّه ، لو  وصل  لیک     العتب

اگبال گبری اجلس یغالی ، و انحت اسراری ابذهب

***

خلّی جسمی اینام لیله ، خلّه  مدفون     التراب

خلّی روح اتطوف یمّک ، او خلّی گلبی بالعذاب

***

وینه العاهد دلیلی ، وینه خل یوفی العهود

وینه و الخاتم دلیله ، وینه خل یشتل ورود

***

اللّه   ویّاک     ابزمانک ، اللّه   ویّاک       ابسرور

اعذرنی لو لحظه ابحیاتی ، ابگلبی لو قطرة غرور

***

جاسم ثعلبی (الحسّانی) 18/06/1396

اغنیّة الوداع

روح حط ایدک بدین العاهدوک

روح عیش ابدار ناس  الصدگوک

گلبی ما  یاسع کلام  البیه عذاب

روح تابع  عشرة   المنّی  خذوک

***

چنت ورده    او  تبتسم  بالذکریّات

او چنّت ناقوس الگلب وکت الممات

صرت خاین  خنت  ما  اسمح تعود

دمّریت   ارسوم  منقوشه   ابنبات

***

تندم او تالی تجی اعیونک تهیل

تجی تتعذّر او ما    عندک  دلیل

ارد اذکرک گلبی   سدّیته ابهواک

اتوادّعینه الدمعه بعیونی تسیل

***

روح تابع گلب  مشحون  ابغرور

روح تابع محب یجلب لک سرور

انا ما افیدک بعد  کلّک    عذاب

ذکریاتک دمعه  بعیونی    تفور

***

تیّهت    دربک   او   تیّهت   الحبیب

اتمرّضینه   او بعد  ما   یاجد   طبیب

الدنیا ترعد  مطر     منهار    المصیر

انجرح گلبی او بعد ما ضنتی یطیب

***

هاک خاتم عقدک او  یمّه الزهور

هاک صندوگ السفر  بیه العطور

هاک کل اصورّک او هاک الغرام

الوداع او  اللّه  یسمحلک   تنور

***

جاسم ثعلبی(الحسّانی) 17/06/1396

اغنیّة : یایمّه

یمّه  سهّرنی  العشگ  و   اتعذّبیت

یمّه حضّی  ما گعد  و     اتمرمریت

یمّه  ما  کو وفه   و الغارف   غرگ

یمّه سرّی ابّطن گلبی او ما حچیت

------

آه  یالمخاخذ  دلیلی ، آه  اون  یا   دمعه سیلی

بالگلّب و ایگلّی شیلی،اعلی القدرنی اتمرّضیت

***

یمّه تعبانی او شتلنی  ابذل  هواه

من غدرنی  اشلون  گلبه  طاوعاه

یمّه یلعب ما یحب و آنه  ابتلیت

اشگد عنید او لچن گلبی ما نساه

-----

آه یا عمری او حیاتی،آه یا طیبی او حلاتی

آه یا موعد  غلاتی ،  ابّطن ذاتی اتکسّریت

***

یمّه افرح  له او   یدوّرلی  العذاب

یمّه یرمینی ابکلامه  ابلحظه  غاب

صخر مرمر گلبه و ادموعی التهیل

اله صارن یمّه   باحلامه  سراب

------

آه غدرانی الحبیب،او جرح  گلبی ما یطیب

ما اظن یشفی الطبیب،الگبری یمّه اتگرّبیت

***

یمّه  غدرانی  ابکلامه  او  سلّمیت

یمّه ما یسمحلی  اسولف و ابتلیت

یمّه ختلانی ختل دگ  رمحه حیل

یمّه بعیونه  سحرنی  او صدّگیت

--------

آه یا شمعة شبابی ،  آه محروگه ابعذابی

آه ممهوره ابعتابی،او بالشماته اتگطّعیت

***

جاسم ثعلبی(الحسّانی) 16/06/1396

قصیده : فمن لیلی فمن مجنون

سهرت اللیل کلّه بس اعد انجوم

ملایین النجوم اتمر علی بارسوم، اظِن مرهون

فمن لیلی فمن مجنون

فیها الوان ، فیها اشکال ، فیها للرصد قانون

فمن لیلی فمن مجنون

فیها راکبین الخیل،او فیها بالدموع اتسیل

او فیها ارماح للیرمون

فمن لیلی فمن مجنون

او فیها اعشاب، او فیها اتراب، او فیها للبشر محراب

للتایه طریجه امسافر او مسجون

فمن لیلی فمن مجنون

او فیها بالاسم معمار، او فیها للسماء مسمار

او فیها اتساعد الطیّار من ظل ابطریقه او بالفلک محتار

وسط الکون

فمن لیلی فمن مجنون

او فیها اکبار او فیها اصغار،او فیها اتنور

مثل الشمس و الناعور

او فیها مظلمه او بالحکمه تطلب نور

مثل القمر و التنّور، او فیها بالشکل یفتون

فمن لیلی فمن مجنون

او فیها اتنام، او فیها اتزور،او فیها للخلّگ ناطور

او فیها للدعاء منشور، او فیها بارده امن البرد بس اتخور

ما تنوصف للناطور، او فیها حاره امن احرور للیزهون

فمن لیلی فمن مجنون

او فیها ابعید ما تنشاف،بس یکشفهه الناظور

او فیها طبّه للمضرور،او فیها اسناد للدکتور

او فیها بالعرش مذکور للروّاد،او فیها اتراب،

او فیها الماء ،او فیها اتعاشر الیمشون

فمن لیلی فمن مجنون

اهوای انجوم مختلفه ابصلاة او صوم

الی کل البشر محتوم،اذا صح الکلام او تعتقد معلوم

من کل السماء یاسع سبع جولات، کل جولة سماء

ما تنوصف لهل الوصف ماعون

فمن لیلی فمن مجنون

اهوای انجوم مخلوقه الاله الکون

و ابدار الضیّافه اترحب الیغزون

من طرت الفجر تتحاسب ابکل لون

فمن لیلی فمن مجنون

کل های النجوم امساهره الدلال

آه یا حال، آه یا بال

کل نجمه یخصهه الکل بلد مفتون

بس نجمة حیاتی تایهه او بالفکره ماتدرون؟

لا تنسون ،لازم نکشف المرهون

لازم نستعد و انحارب الطاعون

لازم بالثقافه انبارز الغازین و الیغزون

فمن لیلی فمن مجنون

هل تعرف فمن لیلی فمن مجنون

اذا ما تعرف اصبر زین

وافتح رمشک ابعینین

او فک باب الگلب و اسئل ضمیرک هین

و اسئل ما جری لحسین

و اسئل کل نبی من گطعوا الچفّین

او من گاد السبایا ابکربلا و الشام مچتوفین

و ابدگ الحرب و اوزاره متعنّین

تعرف زین ،ازیدنّک بعد هالحین

ابمحرابه انضرب و ابدیره مشتاقین

اله مثل الشمس للگاع معطوفین

بس جتّه المنیّه من عدو فتّاک

مرشی ابساعد الغازین

تشهد له الخلّگ مدمون

فمن لیلی فمن مجنون

لیلی انباگت ابدولاب،لیلی انسجنت ابسرداب

لیلی و السعد ما غاب، لیلی اتعاتب الیوفون

فمن لیلی فمن مجنون

لیلی حاربت کل صوت،لیلی ما تهاب الموت

لیلی الکل عشگ منعوته، لیلی اتشابه الیاقوت

لیلی ما مثلهه احباب

لیلی شارب او محراب

لیلی الکل مضیف اشباب

لیلی بیت،لیلی صیت ما تنساب

لیلی الکل حنینه انقاب

لیلی بیرق الخیرین و اهل الصیت

لیلی الکل طفل لولادها چکلیت

لیلی ما تعد بنجوم

لیلی گصبة البلعوم

لیلی ما تباع او تنشری بالسوم

لیلی ذوالفقار او تحصد اهل الگوم

لیلی ما بعدها لیلی او ما تنوصف بارسوم

لیلی دار، لیلی عار للنام ابّختهم عشرة الیهدون

 لیلی جار لیلی غار،لیلی ثار من الغازی و المشحون

لیلی.......

لیلی ابفگد لیلی یلتهب مجنون

یا مجنون،مجنون العواصف بالغدر مسکون

یا مجنون، مجنون الترک حبّه انقدر محزون

یا مجنون، مجنون الترک لیلی ابشتاء و ابصیف

سایب و انتخه ابکارون

یا مجنون، مجنون السهر لیله علی لیلی او قسم بالنون

بس اهل الادب و اهل الشعر سمعوه

ابمجالسهم عجیبه بالقدر یهذون من یحچون

یا مجنون، انت و انا المجنون

ندور انجوم

بیهه ارسوم

بیهه اعلوم

بیهه السکّه والدرّاز

او بیهه الثروه للمحتاز

او بیهه النار تطفی النار

او بیها آبار

او بیهه اهوار

او بیهه انهار

او بیهه النایحه ابکل دار

او بیهه الّابد او محتار

او بیها الخاتل او منهار

او بیهه اسباع ما تنسام

او بیها احلام او بیهه الغام

او بیهه اقلام ، للدمام

او بیهه.......

او بیهه احفاد ابد للقصّه ما ینسون

فمن لیلی فمن مجنون

البلد لیلی تشع بالکون

و انت ابجالهه مأمون

لیلی بالبحر مشحوف

واسمهه بالسفر معروف

امنه و الگلب معطوف

لو فطموک منهه او ما تحب اتشوف؟

ها مجنون کف اللوم دگ ارسوم

اهی لیلی و الک مجنون

اهی لیلی او حبیبه او بالمحبّه اتنون

یا مجنون عوف الخوف

طوف المستحی و الحق سبی الملحون

یا مجنون

یا مجنون

لیلی اترید منّک عون

فمن لیلی فمن مجنون

جاسم ثعلبی(الحسّانی) 13/06/1396

13/12/1438

ابوذیّات مناورات

الگلب ینزف دمع مـــن دم ولم بیه

علی الهارب او شت ضعنه و الم بیه

الجهل جالس ابســد ظهره و الم بیه

الغریب ایشحنه بس یزعـــل علیّه

***

حنانی اویــــــاک ما قصّر و الم بیک

مـــــن الّی جرّحوا گلبک و الم بیک

تبعتک من شفت طبعک و الم بیک

اشمالــــــک دحلبت و ایدک بدیّه

***

اعلمت ما تاسع ابگلبک و احط بیک

بعد ما فاد حش زرعک و احط بیک

ادواک ابراشــــدی ابخدّک و احط بیک

و اعلمــــــــــک درس لتخون الخویّه

***

علــــــــــــی العاند دلیلی احباب ودّیت

ابصله او من رحمی گلت انتشع و ادّیت

اشمالـــــــــک دحلبت دوحست وادّیت

تهین اهــــــــــــــل الکرم عینک جویّه

***

یــــــریت الطیب البگلبی یهل بیک

او نسیت الخیّط اجروحک یهل بیک

تجی ســــــاعه حلو مرّک یهل بیک

او تجی ساعـــــــات تحرگ بالثنیّه

***

طــــــــوّل لا یسحرک لیل ینهار

او عسـی الّی فرّق الخوّان ینهار

تغرگــه ابمشکلاته او قهر ینهار

او یضل مندوم دنیه او آخریّه

***

افتخر بــاحبابک الطیبین جنباک

ابعسر و ابیسر موجودین جنباک

نکـــرت الذاتهم خیرین جنباک

تخلبص تفتن ابـــــکل عنجهیه

***

تزید او تبتکر یـــــــــا دای بالمای

انچمد حچی الکتبته اویای بالمای

یسیر او مــــا وگف للوای بالمای

لان مـــــا عنده ذات او عم علیّه

***

تـــــدحلب تنمطل تعتذر شتحیل

الثنیتک گلبی ما ینعطف شتحیل

الف عجده بدیّه اشنطت شتحیل

انتهیت اویـــاک ما عندک حمیّه

***

انتظرتک تنطرح مــن شهر من عام

خیرک مـــــا لفانی ابطمع من عام

عــــم الطاع مرته او خضع من عام

امسحه امـن الگلب و اکتب وصیّه

***

الولد نار ابگلب تلتهب من جار

اکرمه او لا تشمت اعداک من جار

اجعله جار مـــن جاورک من جار

ابشهر مرّه یمـــــــر یدّی التحیّه

***

احفــادک تنظر او تزهر ورد لک

التشتله یثمر ابگاعــک ورد لک

صخر مرمر ذهب فضّه ورد لک

الرباء او مال الحلال اباثر ضیّه

***

ابشرک مــــــن یزیل الهم و سر بیه

الفــرح و الخیر و احفادک و سر بیه

اخلاقک و استر ابجاهک و سر بیه

ابحکــــــم سلطان تزهر بالوطیّه

***

حــــــلاة البشر معروفه و ذاته

ابگبر یـــــدفن معاداته و ذاته

یـــدوره الصیت معناته و ذاته

گمر یزهی او یحل کل موزمیّه

***

الدهر ما نکّل اهل الطیب من عاد

ولا عـــاد النبی انعد شیب من عاد

المضیف الســاد بابه ابکرم من عاد

ابــــــــــو الغیره الیحل لغز المنیّه

***

جمالــــک غیّر احلامی و مرنی

علی بابک طفل ضامی و مرنی

احس ریحک غفل جانی و مرنی

اعیش اسنین اذا صــــادج علیّه

***

ضفتنی او مرمر تنــی او غبت و انعیت

او بچیت ابدم علیک او شبت و انعیت

وراک الگلــــب شب و التهب و انعیت

انت و الگلــــــــــــــــب صرتوا علیّه

***

کتلنی ابــــــــــرمش عینه الولف من طاب

ارتعش جسمی اویه گلبی ابعزف من طاب

اعیونـــــــــــــی احتجّن الدلال من طاب

اشلفاک او سلّمـــــــــــــــت للبیه اذیّه

***

هلک کل من ضمیره انعاب و انساب

انفلّک مــن عافّته الاحباب و انساب

النّاس اتذکّر امـــــن القاب و انساب

اعمالـــــــــه السمّته او ذاته الردیّه

***

العاقل مــــا یدر للعشگ و انصاب

او مــا یشرب لذیذ المحب و انصاب

ارید ابنـــی ابلیلی الخیّم و انصاب

و اسکن البیه وفه او عنده الحمیّه

***

یگلبـــــــی الما توده جبل من طار

او طیـــر الّی تحبّه ایشیه من طار

صعب تجعل اببابه حرص من طار

خیـــــــــال ایصیر ما ینکض بدیّه

***

الیواعد وعـــــــــــد لازم یمر بیه

ابّطن گلبـــه اعتقد داوی یمر بیه

خصوصاً لو محب صادق یمر بیه

یطفّی النار بــــــارموشه الزهیّه

***

الحب کرامـه الحب شهامه الحب نظام

الحب شجاعه الحب عـداله الحب کلام

الحب ندامه الحب قـرامه الحب سلام

الحب سراب الحب عذاب الحب ختام

***

یغزلان الهوی ابروضی محلچن

العریضی المانـع ابگلبی محلچن

الّبدن، واکلن او طمحن محلچن

اذا لحظه الحســاده الچن اذیّه

***

اهلال او بالسماء حبّی الک یهلاک

العریضی المانـــع الشوفتک یهلاک

الّــــــــی راید عذاب النّاس یهلاک

شنهی الصار وضّح لـــــی القضیّه

***

یــــــدولاب اشکثر دولبّت و ارویت

ابّطن گلبی ابغدر دحلبّت و ارویت

اکرهـــک ما اریدک طفت و ارویت

تجینــــــــی ابلحظة اشواقی الهنیّه

***

اذا حملـــــــــــــک ثگل ینهدر والمال

ابجهالــــــــه او ما یفید السمر و المال

النخاء احبابــــــــه تملّه العرب و المال

اعلی گد حملک دَشد و ابری الخویّه

***

جاسم ثعلبی (الحسّانی) 12/06/1396

12/12/1438

نصیحه للقاری

ارد اکّمّل لک بعد و اترک هواک

الطاوعــــت طیّب و الّا شر لفاک

اللّه لا یرحـــــــم بشر یوم الحشر

ایجازی کل ظالم هتک حرمة بشر

ربّی انت ابکل حـکم عادل حکیم

زیل من کل الخلگ شــر کل لئیم

انت من قولک ادعونی و استجیب

لیش کل هل ظلم و انـــدور طبیب

احکم الحـــــــــــاکم او ذلل قدرته

من یزید الحــــــــد یزید او زمرته

غیر هل طلبه بعد مـــــاکو سئوال

طبّق احکامک لجل نـــــاکل حلال

زامطینه او صــــرنه شیعه ابرادتک

اتچتّفینه او صـــرنـه عون السادتک

اتعذّبینه او مــــا بقی حل للجواب

اتمرمرینه او مــا یجد فم للخطاب

کلمن ایــــــــرید السعاده و الجهاد

یفتی وحده ایچردس الگومه العتاد

النّاس تاهت تسأل او وین الطریق

ابکل مدینه نلتفت شب الــــحریق

وین حکمک وین دینک و الفلاح

للمساجد و الفــــکر طب السلاح

یظلم الشبعان و المـــا عنده دین

یعزم او یهدر ابسد اسم الحسین

و الفقیر ایلم کـــــــراتین الغمام

ایعیّش اعیاله او مــــا یاکل حرام

لیش نبذر لیش نــــــاسین المعاد

نکرم الدنیا او نـــــــاسین الجهاد

العنده مال او حال خل یکرم ضعیف

الخاطر اللّه یرحم ابجسم النظیف

بل عزایم تـــــعزم امفطح چریم

او بالعطایا تلبد ابچم الـــــصریم

خـــاف ربّک شفت شبعان انلطم

من حلاله او ماله ها معری انفطم

تفرس ابمـــالک او مــــا تاخذ ثواب

تبگه روحک فی السماء حگ العذاب

الدنیا عبره اتدلّی المـــــــا عنده شور

اتصوم و اتصلّی او تدعی بالفطور

اجری حق الناس و اتشوف المزاد

یکثر ابرزقک او خاف امن المعاد

و النبی بـــــــکتابه ذاکر قصّته

او علی نص اللیل یــــدفع طلبته

او فاطمه اتصدّق ابخاتمهه الجمیل

و الحسن ساعد او بیه سر او دلیل

و الحسین ابــــــکربلا زاد الکرم

صاح صوت او سمعته کـل الحرم

الامر بــــــالمعروف و المنکر نداه

و الثقافه طلبته العــــــــالم شفاه

ما ابیّن لـــــک کثیر امن الاعمال

اشگد لذیذ ابطعمه کل زاد الحلال

شفت امام او عنده قصره او مالکه؟

او شفت من نسله مظالم سالکه؟

القدره عند اهل العقیده بالعلم

الفکره عند اهل الکرامه بالسلم

الیمه معروفین بخلاق او جمال

الیمه مصتمدین بارجال او کمال

الیمه معدودین قوماً منذرین

ابثوره منصورین ضد الظالمین

الدرب مفتوح او عقل سالم یرید

بالعباده او بس جسم غانم یفید

مونبوگ او نظلم او ناکل حرام

و ابمحرّم  نلطم ابســــــد الامام

او من یجی رمضان نعلن بالسحور

نذکر اللّه ابهل شهر بس بالفطور

بعد رمضان الصلاه نــــامت تمام

یوم عید اللّه العشاء حسن الختام

للابد مرفوضه هــــل فکره ابعتب

لا تبیع اترابک او تنسه الــــذهب

کل عمل معمول اله بُشره او ثواب

اقراء مکتوب ابنظم نص فی الکتاب

تابع القرآن و اتشوف الــــــــدلیل

تعرف الخاطی او مــن دربه الیمیل

انه ویّــــــــــاک ابحشر یوم المعاد

الطمع ما یستر بشر عــــاش ابعناد

ارضی الرب و ارضی خلقه او عشرته

خاطـــــــــــر اتعیش ابمعزّه ابدیرته

و الامامه اسناد النه فــــــــی المسیر

انطبّق احکام اللّه بس نچسی الفقیر

لا بنون اتفید لا مـــــــــال او حلال

ابیوم موتک هذا هــــم آخر سئوال

حطهه ترچیّه بــــــــــــذانک للابد

حتّی فــــــوزک ینتشر یوم السعد

انا شاهد و اللّه یشهد بــــــالشعر

و القیامه اتشوفــــک انجوم الظهر

ال ربّه حبّه ایندهـــا ابطرت الفجر

و الّی مـــــا حبّه یظل جیفه ابگبر

گوم حط ایـــــدک بدیّه و افتخر

اترک الباطل او عــــاطل و انستر

تدری عزرائیل مـــــا یحمل بشر

یقبض الروح او فــــرد لحظه یفر

اهناک عـد ربّک تظل ناطق فقیر

الکان عامل خیر بـــاعمالک تطیر

الکان عامل شـــــر او شر الرتّبک

اللّه یحکـــــم و الملوک اتحاسبّک

ایوزّن اعمالک او ینطق بالکلام

ظـــالم افلان او حسدته او ینام

مستغیب افــلان او هاین عزّته

ماکل احقوقه او ســالب قدرته

ماکل اموال الیتاما ابلا حســـاب

امساعد امواعد او بیّن بــالکتاب

ضارب او سارق او حارض لا تغیر

تبنی اقصورک علی اچتاف الفقیر

اهناه جاوب شنهی تعطی او تقتصر

ابّطن گبرک حتّی توفی او تنطمر

یجی طلّابــــــــک او تتعذّر بناک

اللّه ما یقبل عــــــذر اصلاً هناک

تبقی امچتّف او طلابـــــک وراک

ما طعت للحق اخذ هــــذا دواک

التوبه نعمه باب مفتوح اعلی باب

ابشرط ترضی کل بشر زدّته ابعذاب

روح طیع الحــــــق ابنیّه و اغتسل

و اترک الباطــــل او عوفه وانفصل

اتوضّی حباً طایع ابــــوکت الصلاه

حتّی تعطف ربّک ابیوم الــــــوفاه

قالها الحسّانی الــــــک هذا المصیر

العاند الــــــرب یرتقب درباً خطیر

الحبّه ربّه ایجلبه ابچلمه اوســـطر

او بــالسعاده ایمرّر ادروبه ابعطر

جاسم ثعلبی(الحسّانی) 06/06/1396

ابوذیّات مبرمجات

یگلبی جرّبت ربعــک و لحماک

غریب ابضیج شهدولک ولحماک

تون چا بیش اخیطنّک و لحماک

جرحــوک اشعجب تنسه الاذیّه

***

الکرم والجود بــالغیره و الف راح

ولف حاتم ختم صیته و الف راح

علی دربه ابقصد حبّه والف راح

رجع من شـــاف خدّامه احوریّه

***

مــــن هو النار خالقته و شربه

صدیق او خصم لبن آدم و شربه

ابکلام اجداده امــدحنّه و شربه

یحل کـل مشکله ابریحه الزکیّه

***

من هـــــو العاف ولیانه و الی مال

الی مـــن حاله دم لحمه و الی مال

حلاله ابنص سهم حل لی والی مال

و اذا لابس کفـــــــــن یحرم علیّه

***

من هـو امن العرش ذکره و اله ارکاب

اعلی راسه التاج من لیلو و اله ارکاب

اله جنحـــــان و ایصفّج و اله ارکاب

یغنّی ابصوت و ایحامـــــــی الثنیّه

***

من هو البیه شفاء ثوبه و لحماه

ولا واحــــد رحم حاله و لحماه

یدگ بالبیت مـن توعه و لحماه

ملک یحکــم علیه لو ثخن فیّه

***

من هو انولد بیت اللّه و یومه

او خیبر تشهد افعالــه و یومه

ما فارس کســـر صیته و یومه

بطل حاکم یحل قاضـی علیّه

***

مـن هو البالفلک اسمه ورد بیه

او دعاه امن الارض ربّه ورد بیه

عنده اسمین بــــکتابه ورد بیه

اســم بالسماء او اسمه بالوطیّه

***

من هو الخانته اخوانه و ردهم

عرفهم مـن حکم بیهم و ردهم

جلب بــایمانه صدقانه وردهم

نبی اصبح و ابـــوه سید البریّه

***

من هم عاشروا ظالم و مرهم

ثلاث اقرون فقداهم و مرهم

ابطن کهفة جبل ظاعوا و مرهم

او کلبهم ظافهم و الـــرب تچیّه

***

من هو الّی جلس عل ارض منشاف

امن اهــــد آدم الحد الابد منشاف

مـن هو الترک مای العذب منشاف

الیترکــــــــــــه ابیوم تاتیه المنیّه

***

من هــــو اللابس اعگاله و صیته

العطش و الجوع من ربّه و صیته

یغسّل اذنوب مـن طاعه و صیته

ابختامه النّــــاس تطرد کل بلیّه

***

من هــو الجالس الطیبین و انغاب

رفع من وجهه صیت المکر و انقاب

اذا غائب تــــذکره الخلگ و انغاب

تعزّه النّاس و اهـــــــله و الخویّه

***

التکبّر مـــــــا یلم صدقان و المال

الثگل حمله تعوفه اجناب و المال

المنّه اجبال مــــــا تنحمل و المال

شیل اجبــــــال لا تنخه ابشچیّه

***

من هو الجالس اهل العلم من شار

المشاکل تندفع بـــــــالفکر من شار

اذا وحـــــــدک تگص بالفین منشار

ما تگطع جــــــــــذع داوی اباذیّه

***

النکر ذاته اویه فرسه مایردهه

و اذا حـــــل المحالل مایردهه

ان کان اترید حاجــــه مایرهه

سبع ینشاف بس ما بیه حمیّه

***

هلک کلمن قبل فــــــکره و امرته

اعلی طـــــــرد الاخو وزّته و امرته

امر صائب و الف خاطـی و امرته

تحل و اتشد او تحــــــکم بالثنیّه

***

السعاده اببیت یاسع زرع و الدار

او نساء الوان مثـل الصخر والدار

الغنی ینغاب اذا کـل مهر و الدار

المراة الصالحـــــــــه تسواله میّه

***

انصحک من تذب مالک تمر بیه

لان نخل الزهه ابجاهک تمر بیه

المال ایساعــــــد العاقل تمر بیه

او یزید الخیر لــــو تنطی شریّه

***

وحــــق رب الاعبده اویاک و اهلاک

الطمع ما یرفع اهل الطمع و اهلاک

اعتقد یوم السعد من جاک و اهلاک

یرید الخیر للعایز هـــــــــــــــدیّه

***

الدهر ما ساند الطیبین مـــــــن دار

ولا فاد الترکله دار مـــــــــــــن دار

احتفظ باخوان لو هم غرب من دار

ولا تبغی ابسفاهه اتمــــــــر علیّه

***

الختل مــــــــــا فاد للصیّاد و اغناه

المطرب مـــــا بناله ابیوت و اغناه

الاخوا ما یغتنی امن اخواه و اغناه

عامل کـــــــل بشر باحسن تحیّه

***

وحق دین المسیح او علی و ایهود

مـــــــا نام الظلمله روح و ایهود

گلت للحاقد ابـــکل نطق وایهود

ما هوّد لمّا طـــــــــــــاح ابهبیّه

***

الروح النــــــادره الهیبه ملکها

ابجاه الرب کسب طوعه ملکها

النّاس اجناس و اطباعک ملکها

طیع الرب او عمّر بـــــــالثنیّه

***

جاسم ثعلبی (الحسّانی)04/06/1396

05/12/1438

غزل لا تقتل بشر

اذا تقتل بشر ظل احسب الــــــــحسرات

لأن روح البشر مــــــــــــن اللّه مرسوله

تضل اتون عمر متوسّد الصــــــــــعبات

تطشر ابیوت هـــــــــــا و المثله مگیوله

خضریابس تحرگـــــــه اوتنتحرواتموت

ابتالیت العمر والتفگه مچیولــــــــــــــه

تنطر والحرامـــــــــــــــی ما ینام اللیل

سطــــــــوت شاطر او تسبگهه هلهوله

تتوسف کثیر او تسچب الـــــــــعبرات

علـــــــی ذنب ارتکبته ابعگل بیه لوله

تتخیّل حلم و انت الحــــــــلم و الطیف

مسلسل یرمــــی صوبک وانت مقتوله

لا عین القفت لا دیــــــــــره بیهه الخیر

لا مرود کحل لا فرحــــــــــه منشوله

دگ اعلی الصدروادفع رشاوی اهوای

او بوس اید القدر و اتوســــــد ابقوله

تکسب رادة الدنیا او هـــــــــوا الدینار

او عتبة ربّک البل گبر محمــــــــوله

حیل اویاک یل مادبرتــــــــــها ابشور

مطلوب اعلـــی راس انگطع سنسوله

یـــــــــــا موگد مظیفه الرحّب الخطّار

یا شمعه الدوت و ابــــــــرایه مشیوله

تتیتم اطفـــــــــــال او تنسبی النسوان

علیمن یا غلب یـــــــــا فکره معموله

شنهی الراح منّک بالغضب سکریت

لابس ثوب الاحمـــــــــر سبع تفتوله

عدّی للیضدّک طـــــــوف الحچایات

تتعدّه جبـــــــــــــل و الغیره معدوله

مـا یسوا العمر یخلص وفر وایموع

یا غزوة نبی یا حیره یـــــــــا دوله

جاسم ثعلبی (الحسّانی) 02/06/1396

ابوذّیات مالکات

خجل من لحنی فر قلمی و الـــــکتاب               الـــــکان ایفردش ابشعری والکتاب

بعد لا تنطق ابضدّی و الـــــــــــکتاب               ابنثر ارمیـــــــــــــک اذا تهجم علیّه

                                               ***

ابشبابی او ودعت لی اسباع و ابطال              انغدرت او هل لفانی الحزن و ابطال

ادوّر بالنفایه اکیــــــــــــاس و ابطال               و الاستعمار ظل ایحــــــــــــــود بیّه

                                              ***

بعد ما بیّه اجر قلمی و افــــــــر بیه                احس بالمخ بَرَد هــل صک وفر بیه

اهوم الیابلد لاجــــــــــــی و افر بیه                 و افوخن مـــــــــن هجوم الشعر لیّه

                                             ***

انتظر مکتوب من ولفــی و سربیه                  عهد ینطینی ابحبّه و ســــــــــر بیه

کلامه ناضج ابگلبی و ســــــر بیه                  امــــــن اشوفه ینمسح همّی ابشچیّه

                                             ***

یهل قابض دلیلی ارجـــوک عیده                   ابرمش عینک او لبس املوک عیده

هـــــــم تدری الگلب یا یوم عیده                   یـــــــــــــــوم الّی تجی و اتمر علیّه

                                             ***

ختلنی الهم قــــذف رمحه و صل بای             طبگ گلبی اوکسر ظهری وصل بای

اعجزت ما فادت اخوانی و صل بای             انتکلت اعلــــــــــــی القدر یحکم علیّه

                                             ***

جاسم ثعلبی (الحسّانی) 01/06/1396